IND vs WI 3rd T20: మైదానంలో బ్యాటర్లు పరుగుల వర్షం కురిపిస్తుంటే, సోషల్ మీడియాలో మాత్రం ఆటగాళ్ల మధ్య మైండ్ గేమ్‌లు తారాస్థాయికి చేరాయి. గువాహటి వన్డేలో 406 రన్స్ లక్ష్యాన్ని టీమిండియా ఛేదించిన తర్వాత యువ ఆటగాడు శుభ్ మన్ గిల్ "406? కూల్" అంటూ ఇన్‌స్టాగ్రామ్‌లో పోస్ట్ చేశాడు. దీనికి కౌంటర్‌గా రాంచీ టీ20లో 250 పరుగుల భారీ లక్ష్యాన్ని ఊచకోత కోసిన వెస్టిండీస్ కెప్టెన్ షాయ్ హోప్ "250? కూల్" అంటూ అదిరిపోయే రిప్లై ఇచ్చాడు. ఈ సరదా పోరుతో మరింత ఆసక్తికరంగా మారిన ఇండియా వర్సెస్ వెస్టిండీస్ సిరీస్.. ఇప్పుడు మధ్యప్రదేశ్‌లోని ఇండోర్ వేదికగా మూడో టీ20 పోరుకు సిద్ధమైంది. 1–1 తేడాతో సమంగా ఉన్న సిరీస్‌లో లీడ్ సాధించేదెవరో తేలాల్సిన కీలక సమయం ఆసన్నమైంది.
బౌలర్లకు పీడకలగా ఇండోర్ హోల్కర్ స్టేడియం:
ఇండోర్‌లోని హోల్కర్ స్టేడియం (Holkar Stadium) చిన్న బౌండరీలు, ఫ్లాట్ పిచ్‌లకు కేరాఫ్ అడ్రస్. ఇక్కడ జరిగిన టీ20 మ్యాచ్‌లను గమనిస్తే తొలి ఇన్నింగ్స్ సగటు స్కోరు 200 పరుగులకు పైగానే ఉంది. గతంలో హిట్‌మ్యాన్ రోహిత్ శర్మ శ్రీలంకపై కేవలం 43 బంతుల్లోనే 118 పరుగులు చేసి ఇక్కడ వీరవిహారం చేశాడు. అలాగే 2024 సయ్యద్ ముస్తాక్ అలీ ట్రోఫీలో గుజరాత్ జట్టు కర్ణాటకపై ఏకంగా 251 రన్స్ సాధించింది. ఈ మ్యాచ్‌లోనూ మంచు (Dew) ప్రభావం విపరీతంగా ఉండే ఛాన్స్ ఉంది. దీంతో టాస్ గెలిచిన ఏ జట్టయినా ఆలోచించకుండా ఛేజింగ్ వైపే మొగ్గు చూపుతుంది. ఫ్లాట్ వికెట్లపై భారత బౌలర్లు ఈసారైనా పరుగుల వరదను ఎలా కట్టడి చేస్తారనేది ప్రధాన సవాల్‌గా మారింది.
భారత్‌కు భారీగా వెంటాడుతున్న సమస్యలు:
రాంచీలో 249 పరుగులు చేసినా కాపాడుకోలేకపోవడానికి ప్రధాన కారణం భారత్ బౌలింగ్ వైఫల్యమే. జస్ప్రీత్ బుమ్రా అందుబాటులో లేకపోవడం బౌలింగ్ విభాగానికి పెద్ద మైనస్‌గా మారింది. దీనికి తోడు ఫీల్డింగ్‌లో క్యాచ్‌లు జారవిడవడం, బౌలర్లు సరైన లెంగ్త్‌లో బంతులు వేయకపోవడం హెడ్ కోచ్‌ గౌతమ్ గంభీర్‌ను కలవరపెడుతోంది. మరోవైపు అద్భుతమైన ఫామ్‌లో ఉన్న విండీస్ కెప్టెన్ షాయ్ హోప్‌ను కట్టడి చేయడం భారత బౌలర్లకు కత్తి మీద సాములాంటిదే.
►ALSO READ | ఆర్చరీ ప్రీమియర్‌ లీగ్‌ (ఏపీఎల్‌) సీజన్‌–2.. పృథ్వీరాజ్‌ యోధాస్‌ విజయం
పిచ్ రిపోర్ట్:
• హోల్కర్ క్రికెట్ స్టేడియం: భారతదేశంలోని అత్యుత్తమ బ్యాటింగ్ పిచ్‌లలో ఒకటిగా ప్రసిద్ధి చెందింది. ఇది మంచి బౌన్స్, చిన్న బౌండరీలను (సుమారుగా 56 మీటర్ల చదరపు మరియు 68 మీటర్ల నిటారుగా) కలిగి ఉంటుంది.
• సగటు స్కోర్లు: ఈ వేదికపై మొదటి ఇన్నింగ్స్‌లో సగటు స్కోరు దాదాపు 200 పరుగులు నమోదు అయ్యే అవకాశం ఉంటుంది.
• గత రికార్డులు: ఇక్కడ తరచుగా అధిక స్కోర్లు నమోదవుతాయి. సయ్యద్ ముస్తాక్ అలీ ట్రోఫీలో కర్ణాటకపై గుజరాత్ 251 రన్స్ చేయడం, శ్రీలంకపై భారత్ 5 వికెట్ల నష్టానికి 260 పరుగులు చేయడం వంటివి ఇందులో ఉన్నాయి.
హెడ్ -టు -హెడ్ రికార్డ్స్:
• ముఖాముఖి రికార్డులు (Head-to-Head): భారత్ - వెస్టిండీస్ ఇప్పటి వరకు 33 టీ20 మ్యాచ్‌లలో తలపడగా.. టీమిండియా 21 మ్యాచ్‌లలో విజయం సాధించింది. వెస్టిండీస్ 11 మ్యాచ్‌ల్లో నెగ్గగా, ఒక మ్యాచ్‌లో ఫలితం తేలలేదు. భారత గడ్డపై ఇరు జట్ల మధ్య జరిగిన 13 మ్యాచ్‌లలో భారత్ 10 విజయాలు నమోదు చేసింది.
• మ్యాచ్ ఎక్కడ చూడాలి?: స్టార్ స్పోర్ట్స్ నెట్‌వర్క్ (హిందీ, ఇంగ్లీష్, తమిళం, తెలుగు, మలయాళం) ఛానెళ్లలో ఈ మ్యాచ్ ప్రత్యక్ష ప్రసారం కానుంది. డిజిటల్ స్ట్రీమింగ్ కోసం జియోస్టార్ (JioStar) యాప్, వెబ్‌సైట్‌లో వీక్షించవచ్చు.
